Kaddib markii ay wareegan midkii ka horreeyay Champions League kaga cidhib tireen Manchester United, Atletico Madrid ayaa markana isku diyaarinaysa sidii ay meel ku saari lahayd kooxda kale ee magaalada Manchester ee Man City.
Kooxda tababare Pep Guardiola ayaa wareegii hore isku geyn labadii kulan 5-0 kaga soo guuleysatay Sporting Lisbon halka ay xiddigaha uu Diego Simeone hormoodka u yahay 2-1 uga soo adkaadeen Man United isku darka natiijooyinkii labadii ciyaarood.
Kulankan ayaa noqonaya midkii ugu horreeyay ee ay abid tartan ku kulmaan Man City iyo Liverpool balse maaha markii koowaad ee ay CL isku arkaan Diego iyo Pep iyadoo macalinka ree Argentina ku reebay Guardiola Bayern Munich xilli ciyaareedkii 2015-16.
Wararka Labada Kooxood Ee Kulanka Kahor
Man City ayuu kulankii ugu dambeeyay ganaax kaga maqnaanayaa daafaca midig ee Kyle Walker oo wali maraya ciqaabtii maqnaanshaha saddex kulan kaddib casaan uu qaatay ciyaartii ugu dambaysay Group-yada ee RB Leipzig.
Dhibaatooyinka daafac ee Guardiola haysta ayaan intaas ku ekayn balse waxa sidoo kale dhaawac ku maqnaanaya daafaca dhexe ee Ruben Dias walow uu diyaar yahay John Stones oo kulankii Burnley keydka kusoo bilawday sababtoo ah taxadar loo samaynayay maadaama oo uu xulka England dhaawac fudud kala soo laabtay.
City ayaan ahayn kooxda kaliya ee ciyaartan ka caban karta ganaaxyo balse waxa dhinaca Atleti isaguna ganaax ku maqnaan doona kulankiisii ugu dambeeyay Yannick Carrasco halka Koke iyo Correa ay kasoo laabanayaan ganaaxyo ay horyaalka ku seegeen kulankii ugu dambeeyay.
Soo laabashada Koke iyo Correa ayaa ka dhigan in labada xiddig ee kaliya ee Atletico ka maqnaan doona ay yihiin daafaca dhexe ee Jose Gimenez iyo khadka dhexe ee Hector Herrera iyadoo sidoo kale ay diyaar yihiin Renan Lodi iyo Rodrigo De Paul.
Shaxda Macquulka Ah Ee Labada Kooxood
Manchester City: Ederson; Cancelo, Laporte, Stones, Zinchenko; Silva, Rodri, De Bruyne; Mahrez, Foden, Sterling
Atletico Madrid: Oblak; Savic, Hermoso, Reinildo; Llorente, De Paul, Kondogbia, Koke, Lodi; Griezmann, Felix
Xogta Kulanka
Tartanka: Champions League
Garoonka: Etihad Stadium
Wakhtiga: 10:00 habeenimo xilliga geeska Africa
Garsoore: Istvan Kovacs
By Hussein Jama
April 5, 2022
