Haweenay lagu tilmaamay boqoradda kubadda
dhagi-dhagida ee Afrika ayaa dhoolla tus aad u qurux badan oo ay samaysay uu
soo jiitay indhaha adduunka.
Muuqaal laga arkayo Hadhara Charle oo kubadda ku
ciyaarsinaysa lugta, madaxa iyo qaybaha jidhkeeda, iyada oo aanay mar keliya
dhulka ka taabanayn, ayaa noqday muuqaalkii dhinaca ciyaaraha ugu xiisaha
badnaa ee saacadihii u dambeeyey dadka adduunku isku dhaafsanayeen baraha
bulshada.
Hadhara oo 29 jir ah ayaa hibadeedan ay dunida kaga
yaabisay waxa ay kula soo wareegaysaa dalal badan oo Afrika ka mid ah, si ay
lacag uga qaado dadka isugu soo baxa in ay daawadaan.
Dalalka Koonfur Afrika, Gaboon, Kamaruun, Malaawi,
Musambiik, Kenya iyo Itoobiya oo ay martay ayaa qof kasta oo ka mid ah dadka
daawanaya ciyaar 2 daqiiqo ay ku soo bandhigayso hibadeeda waxa ay ka qaadaysay
4 doolar.
Haweenaydan yaabka leh ayaa sheegtay in ay aad u
taageerto ciyaaryahanno ka kala tirsan kooxo kala duwan oo kubadda cagta ah,
kuwaas oo ay ka mid yihiin Messi, C. Ronaldo iyo xiddigii Ronaldinho.
Dad badan oo daawaday ciyaarta gabadhan oo reer
Tansaaniya ah ayaa ku dooday in waxa ay arkeen aanu ahayn ciyaar qof caadi ahi
samaynayo, waxa aanay aamineen in gabadhani ay adeegsanayso nooc sixirka ka mid
ah. Laakiin Hardhera oo arrintaas wax laga weydiiyey waxa ay ku jawaabtay,
“Dadka qaar ayaa u maleeya in aan sixir isticmaalo,
laakiin ma’ isticmaalo .. waxba kubadda kuma dhex jiraa. Waxa aan isticmaalayaa
xirfadda aan hibada u leeyahay, oo aan horumarinayey kuna tababaranayey muddo
lix sano ah. Waa hibo keliya, ee sixir ma’aha”
Fiidhyowga muujinayey ciyaarha Hadhera Charles oo
baraha bulshada la soo dhigay ayaa waxaa saacadihii u horreeyeyba la daawaday
sagaal milyan oo jeer.
Madaxweyne Trump ayaa isaguna muuqaalkan oo uu dusha
kaga qoray, ‘Amazing’ Cajiib, waxa uu la wadaagay dadka 58 ka milyan ka badan
ee barta twitter ka kala socda.
Sida oo kale dad tiro badan oo kuwa dunida ugu caansan
ka mid ah ayaa barahooda bulshada soo dhigay muuqaalka gabadhan ee amaakagga
abuuray.
Inkasta oo ay qaabkan Hardhar dad badan oo kale hore u
sameeyeen, haddana waxaa la isku waafaqsan yahay in ay iyadu bara dheeraysay
xitaa ninkii caanka ku ahaa ciyaarta noocan ah ee lagu matgacaabi jiray Ausmane
Dembele, oo sannadkii 2017 ka aad u soo shaac baxay.
By admin
February 23, 2019
