Cumaan ayaa dib u dhigtay kulan la qorsheeyay inuu maanta ka dhaco magaalada Salalah, kaas oo ay Iran iyo dalalka Khaliijku kaga wada hadli lahaayeen xaaladda gobolka iyo amniga marin-biyoodka muhiimka ah ee Gacanka.
Wasaaradda Arrimaha Dibadda Cumaan ayaa sheegtay in aanay weli jirin xaalad ku habboon oo lagu qaban karo wada-hadallada, iyadoo xustay in ujeeddadu tahay in la helo hannaan horseedi kara is-afgarad waara oo taageera amniga iyo xasilloonida gobolka.
Iran ayaa iyaduna xaqiijisay dib-u-dhigista kulanka. Mohammad Ali Bak, oo ah agaasimaha guud ee arrimaha Khaliijka ee Wasaaradda Arrimaha Dibadda Iran, ayaa sheegay in go’aanka lagu gaaray codsi ka yimid “qaar ka mid ah dalalka gobolka”, isla markaana Iran iyo Cumaan ay si wadajir ah u go’aansadeen in kulanka dib loo dhigo.
Wasiirka Arrimaha Dibadda Cumaan, Badr Al Busaidi, ayaa sheegay in dib-u-dhigistu ay ku timid “danta is-afgaradka”, balse aanu magacaabin dalalka codsaday in kulanka dib loo dhigo.
Dib-u-dhigista ayaa ku soo beegmaysa xilli xiisadda gobolka ay sare u kacday, gaar ahaan kadib weerarro lagu qaaday maraakiib ganacsi iyo dalal ku yaalla Gacanka. Arrintan ayaa saameyn ku yeelatay isu-socodka maraakiibta ee marin-biyoodka Hormuz, oo ah marin muhiim u ah ganacsiga iyo gaadiidka tamarta caalamka.
Iran iyo Cumaan ayaa bishii hore sheegay inay ku heshiiyeen hannaan lagu maareynayo isu-socodka maraakiibta, kaas oo ay ku jireen samaynta marin ku-meel-gaar ah oo maraakiibta ay isticmaalaan iyo qorshe lagu nadiifinayo miinooyinka. Labada dal ayaa sidoo kale sheegay in dalalka ku teedsan Gacanka lagu dari doono wada-hadallada mustaqbalka.
Xogta dabagalka maraakiibta ayaa muujisay in isu-socodka maraakiibta ganacsiga ee Hormuz uu si weyn hoos ugu dhacay. Dhammaadkii toddobaadkan, afar markab ayaa ka baxay Gacanka iyagoo maraya marin-biyoodka, halka 10 markab ay gudaha u galeen, inkastoo xogtu aanay ku jirin maraakiib laga yaabo inay damiyeen qalabkooda raadraaca.
Wararka ayaa sidoo kale sheegaya in Sacuudiga Carabiya uu walaac ka muujiyay wax-ka-beddello lagu sameynayo heshiiskii Iran iyo Cumaan, halka Baxrayn ay hore u sheegtay inaanay ka qaybqaadan doonin wada-hadallada.
Ilaa hadda lama shaacin taariikh cusub oo loo qabtay kulanka. Iran waxay sheegtay inay weli ka go’an tahay wada-tashiyada gobolka, halka Cumaan ay sii waddo dadaalladeeda diblomaasiyadeed ee ay ku doonayso in la helo hannaan lagu soo celin karo amniga iyo isu-socodka maraakiibta ee marin-biyoodka Hormuz.
Xaaladda marin-biyoodka Hormuz ayaa sidoo kale muhiim u ah dhaqaalaha caalamka, maadaama carqaladaha ka jira halkaasi ay saameyn ku yeelan karaan qiimaha shidaalka iyo ganacsiga badda ee gobolka iyo dunidaba.
By 
