Kyrenia — Ugu yaraan siddeed qof ayaa ku geeriyooday kadib markii doon rakaab ah oo ku sii jeedday dalka Turkiga ay ku degtay xeebaha waqooyiga Qubrus.
Doonta oo ah nooca catamaran-ka ayaa sidday ku dhowaad 270 qof, waxaana ay ku qalibantay meel qiyaastii afar mayl-badeed u jirta magaalada Kyrenia, oo sidoo kale loo yaqaan Girne.
Maamulka Waqooyiga Qubrus ayaa sheegay in 249 qof la soo badbaadiyey, halka 18 qof weli la la’yahay. Maamulkaasi wuxuu iskiis ugu dhawaaqay inuu yahay dal, waxaana si rasmi ah u aqoonsan oo keliya Turkiga.
Kabtanka doonta iyo toddoba xubnood oo kale oo ka tirsanaa shaqaalaha ayaa la xiray, iyadoo baaritaan lagu sameynayo sababta keentay shilkan.
Hawlgal baadi-goob iyo samatabbixin ah ayaa weli ka socda goobta, waxaana ka qayb qaadanaya masuuliyiin ka tirsan Turkiga. Masuuliyiintu waxay sheegeen in inta badan dadkii saarnaa doonta la soo badbaadiyey.
Doontu ayaa markii dambe gebi ahaanba quustay, iyadoo masuuliyiintu isku dayayaan inay soo helaan qalabka kaydiya xogta markabka, si loo ogaado faahfaahinta iyo sababihii sababay shilka.
Doonida gaarka loo leeyahay ayaa ka baxday goobta dalxiiska ee Kyrenia abbaaraha 12:30 duhurnimo, xilliga maxalliga ah, iyadoo ku wajahneyd Turkiga.
Raysal Wasaaraha Waqooyiga Qubrus, Üstel, ayaa sheegay in safarka doonta loo qorsheeyay Sabtidii, balse dib loo dhigay sababo la xiriira xaaladaha cimilada oo xumaa.
Üstel oo la hadlay warbaahinta Turkiga ee TRT ayaa sheegay in doonta ay ku dhufteen laba hir oo xooggan ka hor inta aysan quusin.
Maamulka ayaa sheegay in baaritaanka iyo hawlgalka samatabbixintu ay socdaan, iyadoo mudnaanta la siinayo badbaadinta dadka weli la la’yahay iyo xaqiijinta sababta rasmiga ah ee shilka.
By Warda
August 31, 2026
