Dagaallo culus ayaa ka socda gobolka Blue Nile ee koonfur-bari Suudaan, halkaas oo ciidamada dowladda Suudaan ay dagaallo kula jiraan xoogagga RSF iyo SPLM-N, iyadoo loollanku ka socdo goobo istiraatiiji ah oo ku dhow xadka Itoobiya.
Ciidamada Suudaan ayaa sheegay inay soo rideen diyaarado aan duuliye lahayn oo ay sheegeen inay ka yimaadeen dhanka Itoobiya. Hase yeeshee, si madax-bannaan looma xaqiijin cidda dirtay diyaaradahaasi. Itoobiya ayaa hore u beenisay eedeymo la xiriira inay taageerto RSF.
Dhanka kale, RSF iyo SPLM-N ayaa sheegtay inay la wareegeen fariisimo muhiim ah oo ku dhow xadka, balse sheegashooyinka dhinacyada dagaallamaya iyo xaaladda dhabta ah ee goobahaasi weli si madax-bannaan looma xaqiijin.
Dagaalka sii fidaya ayaa sare u qaadaya walaaca laga qabo in colaadda Suudaan ay saameyn ku yeelato dalalka deriska ah, gaar ahaan Itoobiya iyo Chad, taas oo keeni karta khataro amni iyo barakac hor leh.
By Warda
August 29, 2026
