Dalalka iyo ururrada caalamiga ah ee maraakiibta dagaalka ku haya biyaha Soomaaliya ayaa ka walaacsan kororka weerarrada burcad-badeedda, iyadoo muddo kooban lagu afduubtay in ka badan 10 markab.
Sida ay sheegayaan ilo kala duwan, saraakiil ka tirsan ciidamada badda ee dalalka ka howlgala xeebaha Soomaaliya ayaa yeeshay kulamo looga hadlayo sidii loo xoojin lahaa iskaashiga iyo tallaabooyinka lagu wajahayo khatarta sii kordhaysa.
Ciidamada badda ee caalamiga ah ayaa diiradda saaraya ilaalinta maraakiibta ganacsiga ee mara Badweynta Hindiya iyo Gacanka Cadmeed, gaar ahaan meelaha ku dhow xeebaha Soomaaliya, si looga hortago afduub iyo weerarro kale.
Xogaha la helayo ayaa tilmaamaya in burcad-badeeddu ay dib u kordhiyeen dhaqdhaqaaqooda marka loo eego sannadihii u dambeeyay, iyadoo la sheegay in illaa 13 markab la weeraray ama la qafaashay.
Soo laabashada burcad-badeednimadu waxay walaac ku tahay amniga iyo ganacsiga badda, iyadoo dalalka ku howlan ilaalinta marinnada badda ay hadda doonayaan inay xoojiyaan wada-shaqeynta si looga hortago in kooxaha burcad-badeeddu mar kale yeeshaan awood ballaaran.
Amniga xeebaha Soomaaliya ayaa sidoo kale muhiim u ah dhaqaalaha dalka iyo ganacsiga caalamiga ah, maadaama maraakiib badan ay maraan biyaha ku teedsan xeebaha Soomaaliya.
By Warda
August 29, 2026
