Eduardo Inda, oo ah aasaasaha wargeyska Okdiario, ayaa sheegay in xiddiga Paris Saint-Germain ee Lionel Messi uusan ku faraxsaneyn Paris isla markaana uu doonayo inuu ku laabto Barcelona.
Kadib markii uu xirfadiisa ciyaareed inteeda badan ku soo qaatay Barcelona, Messi ayaa ku biiray PSG xagaagii 2021 isaga oo ugu biiray qaab xor ah markii uu dhacay heshiiskiisa kooxda Barcelona.
Nasiib darro, 34-sano jirku wuxuu ku dhibtooday inuu qaab ciyaareed fiican ku soo bandhigo kooxda ka dhisan caasimada France waxana uu ka fikirayaa in uu isaga tago kooxda xagaaga.
sida laga soo xigtay Inda, Xiddiga kooxda Paris Saint-Germain ayaa Khaati ka taagan caasimada France waxana uu jeclaan lahaa in uu ku soo laabto Barcelona.
“Waxaa la ii sheegay in Messi uu doonayo inuu ka tago PSG xagaagan, inuu qaati ka taagan yahay.”
Waxa uu intaa ku daray in Xavi diyaar u yahay in uu Messi ku soo dhaweeyo Barcelona laakiin madaxweynaha Barca Joan Laporta ma doonayo inuu dib u soo celiyo kabtankii hore ee kooxda.
“Wuxuu doonayaa inuu ku laabto Barcelona, waxaana la ii sheegay qofka xannibay inuu yahay Joan Laporta. Xavi diyaar ayuu u yahay in uu Messi ku soo dhaweeyo Camp Nou”.
By Hussein Jama
March 26, 2022
