Daafaca dhexe ee kooxda Barcelona ee Eric Garcia ayaa hadal kusii jidh dilay garabka Real Madrid ee Vinicius Jr kulankii ay kooxdiisu xalay guusha weyn ee taariikhiga ah kusoo gaadhay Santiago Bernabeu.
Barcelona ayaa 4-0 kaga soo adkaatay Real kaddib afar gool oo ay ka kala heshay Pierre Emerick Aubameyang oo laba dhaliyay iyo min hal gool oo ay saxeexeen Ronald Araujo iyo Ferran Torres.
Barca ayaa guushaas iskaga soo af-meertay ceebtii ahayd shan guuldarro oo xidhiidh ah oo kasoo gaadhay Los Blancos xilli ay waliba soo bandhigeen ciyaar qurux badan oo ka turjumaysa waxa uu Xavi Hernandez ka hirgelinayo kooxda.
Eric Garcia ayaa kaddib dhammaadkii ciyaarta si jees-jees ah ugu hambalyeeyay Vinicius qaab ciyaareedkiisii kulankaas walow uusan wax gool ah dhalin isla markaana lagu eedeeyay inuu is-tuuray qaybtii hore isaga oo rigoore raadinaya.
“Waryaa, adigu xilli ciyaareedka dambe waxaad qaadaysaa Ballon d’Or, Ballon d’Or” ayuu yidhi daafacii hore ee Manchester City oo ku jeesjeesaya Vini.
By Hussein Jama
March 21, 2022
