Tababaraha kooxda Manchester City ee Pep Guardiola ayaa marmarsiiyo cajiib ah u sameeyay bar-bardhacii goolal la’aanta ahaa ee ay kooxdiisu xalay lasoo gashay Crystal Palace oo ay gegida Selhurt Park marti ugu ahaayeen.
Palace iyo tababare Patrick Vieira ayaan xill ciyaareedkan wax goolal ah ka qaabilin kooxda Pep Guardiola, wareegii hore ayay guul 2-0 ah kusoo gaadheen Etihad Stadium xilli ay xalay goolal la’aan ku heshiiyeen.
Natiijadaas ayaa ka dhigan in Liverpool oo kulankeedii baaqiga u ahaa habeen dambe la ciyaaraysa Arsenal ay haatan kaliya afar dhibcood ka dambayso Sky Blues.
Guardiola ayaa kulanka kaddib sheegtay cabasho aan looga badan isaga oo ku dooday in dooga garoonka oo aan fiicnayn uu kamid yahay sababaha ay dhibcaha u lumiyeen xalay.
“Waxaanu u ciyaarnay si aanu kulanka u guuleysano, fursado badan ayaanu abuurnay, fursado yar ayaanu u ogolaanay. Xogtu way qorantahay” ayuu ugu horreynba macalinka Manchester City u sheegay Sky Sports.
“Qaab fiican ayaanu ugu ciyaarnay garoon adag oo uusan doogiisu ahayn mid fiican. Halkaas ayaanu joognay wakhtiga oo dhan sidaad darteed kulan fiican ayaanu ciyaarnay”.
By Hussein Jama
March 15, 2022
