Madaxwaynihii Hore Ee Somaliland mudane Daahir Riyaale Kaahin ayaa ku baaqay in laga shaqeeyo nabadaynta beelaha ku dagaalamaya magaalada Ceel-afweyn ee gobalka Sanaag.
Mudane Rayaale waxa uu sheegay in aanay xal u raadinta colaaddaasi ku habboonayn in la isku tuurtuuro, ama laga dhigo arrin la isku haysto. Sida uu hadalka u dhigay. Isaga oo ku taliyey in la ilaaliyo nabadgelyada oo uu sheegay in ay tahay furaha nolosha.
Mudane Rayaale waxa uu
sheegay in colaadda Ceel Afweyn xallinteda ay ka hawlgaleen ergooyin ka socotay
Somaliland oo dhan, balse ay tixgalin waayeen dhinacyada dagaalamaya. Isaga oo
nasiibdarro ku tilmaamay in ay dagaal iskaga hor yimaaddaan Wiil iyo abtigii,
taas oo uu sheegay in sababteedu ay tahay aafadda qabyaaladda oo uu ku
tilmaamay mushkilada koowaad ee Soomaalida.
Madaxwaynihi hore waxa
uu sheegay in inkasta oo ay meel fiican marayso xaaladda guud ee dalka iyo gaar
ahaan gobalka Awdal, haddana ay jiraan turaanturooyin, sidaa awgeed ay habboon
tahay in markiiba laga hawlgalo xallintooda.
Mudane
Daahir Riyaale Kaahin oo arbacada 25-ka Sabtembar ka hadlay xaflad qalinjebin
arday jaamacadeed ah ayaa ka sheekeeyey colaado sokeeye oo uu xalintooda ku
guulaystay wakhtiigii uu ahaa madaxwayne ku xigeenka, kuwaas oo ka dhacay
magaalooyinka Burco iyo Ceerigaabo, islamarkaana uu ku guulaystay in dadkaasi
uu heshii waara ka dhex dhaliyo, nidaam dawladnimona laga hrigaliyo deegaankooda.
By Hussein Jama
September 25, 2019
