Ciidamada Mareykanka ayaa 1-dii Sebtembar 2026 duqeymo cusub ka fuliyay gudaha Iran, gaar ahaan goobo militari oo ay ku jiraan nidaamyada difaaca cirka iyo raadaarrada, kaddib markii uu dib u soo laba kacleeyay dagaalka u dhexeeya Washington iyo Tehran oo muddo bil ah hakad ku jiray.
Taliska Dhexe ee Mareykanka (CENTCOM) ayaa sheegay in duqeymaha ay jawaab u yihiin weerarro iyo isku dayo ay Iran ku beegsanaysay maraakiibta ganacsiga ee mara Marinka Hormuz iyo ciidamada Mareykanka ee gobolka.
Iran ayaa dhankeeda ku jawaabtay gantaallo iyo diyaarado aan duuliye lahayn oo lagu bartilmaameedsaday goobo ay joogaan ciidamada Mareykanka, iyadoo Mas’uuliyiinta Iran ay ku hanjabeen aargoosi ka dhan ah weerarrada Washington.
Madaxweynaha Mareykanka Donald Trump ayaa uga digay Tehran inay wajihi doonto weerarro ka sii xoog badan haddii ay sii waddo jawaabaha militari. Trump wuxuu sheegay in tallaabooyin ka culus kuwii hore ay diyaar yihiin haddii Iran ay sii waddo aargoosiga.
Dhanka kale, duqeyn Mareykan ah ayaa ku dhufatay guri lagu qabanayay xaflad aroos oo ku yaalla koonfurta Iran, iyadoo wararka laga helayo ay sheegayaan in dad rayid ah lagu dilay, kuwo kalena lagu dhaawacay. Warbixinnada hore ayaa tirada khasaaraha ku kala duwanaa.
Dib u soo noqoshada dagaalka ayaa sare u qaadday walaaca laga qabo amniga Bariga Dhexe, gaar ahaan Marinka Hormuz oo ah marin muhiim u ah ganacsiga caalamka iyo gaadiidka tamarta. Xiisad ka sii darta halkaas waxay saameyn ku yeelan kartaa maraakiibta ganacsiga, qiimaha shidaalka iyo dhaqaalaha caalamka.
By Warda
September 2, 2026
