Shaqaalaha Jomo Kenyatta International Airport ee magaalada Nairobi ayaa galay maalintii labaad ee shaqo-joojin, taas oo sababtay dib-u-dhac ku yimid duulimaadyada isla markaana saameysay kumannaan rakaab ah.
Ururka Shaqaalaha Duulista Kenya ayaa sheegay in shaqo-joojintu ka dhalatay cabashooyin dhowr ah, oo ay ka mid yihiin heshiis shaqaale oo aan weli lala gaadhin Hay’adda Duulista Rayidka Kenya, iyo waxa ururku ku tilmaamay wada-shaqeyn la’aan ka dhex jirta Hay’adda Garoomada Diyaaradaha Kenya iyo shirkadda diyaaradaha ee Jambojet.
Hay’adda Garoomada Kenya ayaa Axaddii xaqiijisay in qaar ka mid ah duulimaadyadu dib u dhaceen, balse ma aysan faahfaahin sababta keentay dib-u-dhacyada.
Dhanka kale, shirkadda diyaaradaha Rwanda ee RwandAir ayaa sheegtay inay baajisay laba duulimaad, iyadoo sabab uga dhigtay caqabado la xidhiidha maamulka hawada ee garoonka Nairobi.
Warbaahinta maxalliga ah ayaa soo xigatay rakaab sheegay inay saacado badan ku sugnaayeen garoonka, iyadoo qaar ay sheegeen inay sugayeen in ka badan 12 saacadood.
Ururka shaqaalaha iyo dowladda Kenya ayaa Axaddii yeeshay kulan ay kaga wada hadlayeen khilaafka, balse heshiis kama soo bixin. Wadahadallada ayaa la filayaa in dib loo bilaabo, iyadoo shaqo-joojintuna ay weli socoto.
By Warda
August 31, 2026
