Soomaaliya iyo Shiinaha oo Xoojinaya Iskaashiga Ganacsi iyo Maalgashi

Muqdisho — Ra’iisul Wasaare ku-xigeenka Soomaaliya, Saalax Axmed Jaamac, ayaa Talaadadii si rasmi ah u furay Madasha Isku-xidhka Ganacsiga Soomaaliya iyo Shiinaha oo lagu qabtay Muqdisho, iyadoo dowladda Soomaaliya ay doonayso inay dalka ku soo jiidato maalgashi Shiinuhu leeyahay, isla markaana ay ballaariso xiriirka ganacsi ee labada dhinac. 

Madasha waxaa soo qabanqaabiyay Wasaaradda Ganacsiga iyo Warshadaha Soomaaliya, waxaana ka qaybgalay wasiirro ka tirsan dowladda federaalka, safiirrada Soomaaliya iyo Shiinaha, wakiillo ka socday Rugta Ganacsiga iyo Warshadaha Soomaaliya iyo Rugta Ganacsiga Shiinaha iyo Afrika, iyo sidoo kale ganacsato iyo maalgashadayaal ka kala socday labada dal. 

Saalax Axmed Jaamac ayaa shirkadaha iyo maalgashadayaasha Shiinaha ugu baaqay inay ka faa’iidaystaan fursadaha maalgashi ee Soomaaliya ka jira, gaar ahaan dhinacyada kaabeyaasha dhaqaalaha, wax-soo-saarka, kalluumaysiga, beeraha, tamarta, gaadiidka iyo saadka. 

Wuxuu sheegay in iskaashiga ganacsi ee Soomaaliya iyo Shiinaha uusan ku koobnaan ganacsi iyo maalgashi oo keliya, balse uu sidoo kale gacan ka geysan karo abuurista shaqooyin, kordhinta wax-soo-saarka gudaha iyo horumarinta dhaqaalaha guud ee dalka. 

Madashan ayaa fursad u siinaysa ganacsatada labada dal inay ka wada hadlaan iskaashi, maalgashi iyo xiriirro ganacsi oo cusub. Dowladda Soomaaliya waxay maalgashiga shisheeye iyo horumarinta ganacsiga gaarka loo leeyahay u aragtaa qayb muhiim ah oo ka mid ah dadaallada dib loogu dhisayo dhaqaalaha dalka. 

Shiinaha ayaa muddo dheer ka qaybqaadanayay mashaariicda kaabeyaasha iyo horumarinta ee dalal badan oo Afrika ah, waxaana dowladda Soomaaliya ay raadineysaa in ay hesho khibrad iyo maalgelin Shiinaha ah oo lagu horumarin karo qaybaha wax-soo-saarka iyo kaabeyaasha dhaqaalaha. 

Dowladda Soomaaliya ayaa sidoo kale sheegtay in iskaashi ballaadhan oo lala yeesho shirkadaha Shiinaha uu gacan ka geysan karo kobcinta awoodda dhaqaale ee dalka iyo abuurista fursado ay ka faa’iidaystaan shirkadaha iyo shaqaalaha Soomaaliyeed.

Mas’uuliyiinta Soomaaliya waxay rajeynayaan in madashu ay horseeddo heshiisyo maalgashi oo la taaban karo iyo iskaashi ganacsi oo muddo dheer ah oo dhex mara shirkadaha Soomaaliyeed iyo kuwa Shiinaha. 

Dadaallada lagu soo jiidanayo maalgashiga shisheeye ayaa qeyb ka ah qorshayaasha dowladda Soomaaliya ee lagu horumarinayo kaabeyaasha dhaqaalaha, shaqo-abuurka iyo qaybaha wax-soo-saarka, iyadoo la doonayo in la kordhiyo wax-soo-saarka gudaha isla markaana la yareeyo ku-tiirsanaanta badeecooyinka dibadda laga keeno.