Ruushka ayaa Ingiriiska ugu hanjabay tallaabooyin adag, kadib markii Ukraine ay adeegsatay diyaarado aan duuliye lahayn oo lagu sameeyay Ingiriiska.
Wararka ayaa sheegaya in Moscow ay London ku eedaysay inay si toos ah uga qayb qaadanayso dagaalka Ukraine, iyadoo ciidanka Ukraine ay adeegsanayaan diyaarado aan duuliye lahayn oo lagu soo saaray ama taageero ka helay Ingriiska.
Ruushku wuxuu sheegay in adeegsiga hubkan uu kordhinayo khatarta ah in dagaalku sii fido, wuxuuna Boqortooyada uga digay cawaaqib ka dhalan kara taageerada militari ee ay siiso Ukraine.
Ingiriiska ayaa ka mid ah dalalka Yurub ee sida weyn u taageera Ukraine tan iyo markii Ruushku bilaabay duullaanka 2022.
Xiisaddan cusub waxay muujinaysaa sida dagaalka Ukraine uu u sii kordhinayo khilaafka tooska ah ee u dhexeeya Ruushka iyo dalalka reer Galbeedka.
By Warda
August 19, 2026
