Itoobiya oo Taliyihii Hore ee AMISOM u Magacowday Taliyaha Booliska Amxaarada

Addis Ababa — Dowladda Itoobiya ayaa Sarreeye Guud Tgabu Yilma u magacowday Taliyaha Booliska Gobolka Amxaarada, iyadoo sarkaalkani hore u soo noqday taliyaha Hawlgalka Midowga Afrika ee Nabadda Ilaalinta Soomaaliya (AMISOM).

Magacaabista waxaa shaaciyay madaxa Gobolka Amxaarada, Arga Kebede, sida lagu sheegay qoraal uu ku baahiyay bartiisa Facebook.

Tgabu ayaa xilka kala wareegaya Dr. Zelem Kingdome, oo shantii sano ee lasoo dhaafay ahaa madaxa Agaasinka Guud ee Booliska Gobolka Amxaarada, kaas oo dib ugu laabtay xilalkiisii hore.

Sarreeye Guud Tgabu ayaa in ka badan 40 sano ka soo shaqeeyay Ciidamada Difaaca Itoobiya. Saddexdii sano ee lasoo dhaafay wuxuu hoggaaminayay ciidamada booliska ee Amxaarada, xilli gobolka uu wajahayay dagaallo iyo xaalado amni oo adag.

Ka hor xilkan, Tgabu wuxuu soo noqday madaxa Agaasinka Guud ee Caafimaadka Ciidamada Difaaca Itoobiya, madaxa Waaxda Saadka Ciidamada Difaaca iyo xubin ka tirsan Golaha Difaaca dalka.

Magacaabista ayaa ku soo beegmaysa xilli dowladda Itoobiya ay waddo dadaallo lagu xoojinayo amniga Amxaarada, halka gobolka ay weli ka jiraan dhaqdhaqaaqyo kooxo hubaysan.

Zemene Kasse, oo hoggaamiya Dhaqdhaqaaqa Qaran ee Amxaarada Fano, ayaa wargeyska Faransiiska ah ee Le Temps u sheegay in wada-hadallo iskaashi oo lala yeelanayo kooxo kale, oo ay ku jiraan xoogagga Tigray, ay socdeen muddo ku dhow siddeed bilood.

Sida uu sheegay Kasse, kooxaha lagu sheegay wada-hadalladaas waxaa ka mid ah xoogag ka soo jeeda Gumuz, Berta, Soomaalida iyo Oromada.

Ciidamada Difaaca Itoobiya ayaa inta badan hoggaamiya hawlgallada lagu xakameynayo kooxaha hubaysan ee ka hawlgala gobolka, iyadoo ciidamada booliska Amxaaraduna ay qayb ka yihiin hawlgallada.

Magacaabista sarkaal khibrad dheer u leh arrimaha ciidamada iyo amniga ayaa imanaysa xilli xaaladda Amxaarada ay weli tahay mid xasaasi ah.

Xaaladda amni ee Itoobiya ayaa muhiim u ah guud ahaan Geeska Afrika, oo ay Somaliland ku taallo, maadaama xasilloonida gobolka ay muhiim u tahay ganacsiga, isu-socodka iyo iskaashiga amni ee dalalka gobolka.