Addis Ababa โ 15 Agoosto 2026: Shirkadda diyaaradaha ee Zambia Airways ayaa Aman Wole, oo ka tirsan madaxda sare ee Ethiopian Airlines, u magacawday Agaasimaha Guud (CEO), iyadoo uu leeyahay in ka badan 19 sano oo khibrad ah oo dhinaca duulista caalamiga ah.
Zambia Airways waa shirkad iskaashi ah oo 55% ay leedahay Industrial Development Corporation (IDC) ee Zambia, halka 45% ay leedahay Ethiopian Airlines. Aman Wole ayaa xilka si rasmi ah u qabtay 1-da August 2026, kaddib markii uu xilal sare kasoo qabtay Ethiopian Airlines oo ka hawlgasha Afrika, Yurub iyo Aasiya.
Khibraddiisa ayaa ku saabsan hoggaaminta shirkadaha diyaaradaha, istaraatiijiyadda ganacsiga, iibka, horumarinta suuqyada iyo iskaashiyada istaraatiijiga ah.
Xilka cusub, Aman ayaa diiradda saari doona horumarinta adeegyada iyo khibradda rakaabka, ballaarinta duullimaadyada, xoojinta iskaashiyada iyo xaqiijinta joogteynta dhaqaale ee shirkadda.
Guddoomiyaha Guddiga Maamulka Zambia Airways, Jomo Matululu, ayaa sheegay in magacaabistu muujinayso sida guddigu uga goโan yahay hoggaan adag iyo dhismaha shirkad diyaaradeed oo tartan leh, ammaan ah, macaamiisha u adeegta, isla markaana Zambia ku xidhaysa fursadaha gobolka iyo caalamka.
Aman Wole ayaa dhankiisa sheegay inuu sharaf u arko hoggaaminta Zambia Airways xilli muhiim u ah horumarka shirkadda.
Magacaabistan ayaa sidoo kale muujinaysa sii xoogaysiga xidhiidhka dhinaca duulista ee Itoobiya iyo Zambia, iyadoo Ethiopian Airlines ay qayb weyn ku leedahay lahaanshaha Zambia Airways.
By Warda
August 16, 2026
