Taliyaha Ciidamada Difaaca Uganda (UPDF), General Muhoozi Kainerugaba, ayaa sheegay in Uganda ay si buuxda ciidamadeeda uga soo saari doonto Soomaaliya ugu dambayn 1-da Agoosto 2027, taas oo soo afjari doonta ku dhowaad labaatan sano oo ciidamo Uganda ahi ka qaybqaadanayeen hawlgallada amniga Soomaaliya.
Kainerugaba ayaa sheegay in ka dib taariikhdaas aysan Soomaaliya joogi doonin wax ciidan ah oo ka tirsan UPDF. Go’aankan ayaa ku soo beegmaya xilli Soomaaliya ay waddo qorshe ay mas’uuliyadda amniga si tartiib ah ugu wareejinayso ciidamada gudaha.
Uganda waxay ka mid tahay dalalka ugu waaweyn ee ciidamadu ka joogaan Soomaaliya, iyadoo qayb ka ah howlgalka Midowga Afrika ee AUSSOM, kaas oo taageera ciidamada Soomaaliya dagaalka ay kula jiraan Al-Shabaab.
Go’aanka Kampala ayaa sidoo kale imanaya xilli AUSSOM ay wajahayo caqabado dhinaca maalgelinta iyo taageerada saadka ah. Warbixintu waxay sheegtay in Maraykanku uu joojinayo taageeradii uu siin jiray maalgelinta saadka howlgalka, halka Xafiiska Taageerada Qaramada Midoobay ee Soomaaliya (UNSOS) uu bilaabay diyaar-garow ku saabsan dhimista hawlihiisa.
Madaxweynaha Soomaaliya Xasan Sheekh Maxamuud ayaa horay u sheegay in Soomaaliya ay diyaar u tahay inay si buuxda ula wareegto mas’uuliyadda amniga dalka, isla markaana ciidamo shisheeye ay ugu dambayn ka bixi karaan Soomaaliya.
Ka bixitaanka Uganda wuxuu noqon karaa marxalad muhiim ah oo lagu tijaabinayo awoodda ciidamada Soomaaliya iyo qorshaha kala-guurka amniga. Waxa kale oo uu saameyn ku yeelan karaa qaab-dhismeedka amniga Geeska Afrika iyo howlgalka AUSSOM.
Qorshaha bixitaanka Uganda ayaa sidaas darteed noqonaya mid si dhow loo la socdo, iyadoo indhaha lagu hayo awoodda ciidamada Soomaaliya, mustaqbalka AUSSOM iyo jihada amni ee Geeska Afrika
By Warda
August 29, 2026
