Ugu yaraan **62 qof ayaa ku dhintay roobab mahiigaan ah iyo fatahaado** ka dhacay gobolka Uttar Pradesh ee waqooyiga Hindiya, sida ay sheegeen mas’uuliyiinta gobolka.
Dowladda Uttar Pradesh ayaa sheegtay in **46 qof ay ku dhaawacmeen**, halka in ka badan **1,000 guri** ay waxyeello kasoo gaartay fatahaadaha ka dhashay roobab socday muddo saddex maalmood ah.
Qaar ka mid ah iskuullada ayaa Isniintii la xidhay, gaar ahaan magaalada caasimadda ah ee Lucknow, iyadoo kooxaha gurmadka ay dadka ka daadgureynayeen goobaha ay biyuhu ku fataheen.
Mas’uuliyiintu waxay shacabka kula taliyeen inay ka fogaadaan safarrada aan daruuriga ahayn, gaar ahaan meelaha ay biyuhu fadhiyaan, iyo webiyada, togagga iyo biyo-mareennada ay biyuhu si xooggan u marayaan.
Atul Kumar Singh, oo ah saynisyahan sare oo ka tirsan Xarunta Saadaasha Hawada Gobolka ee Lucknow, ayaa sheegay in roobabka la filayo inay yaraadaan laga bilaabo Isniinta, kaddib markii nidaamkii cimilo ee ka jiray Bay of Bengal uu daciifay. Si kastaba, roobab fudud ayaa laga filayaa qaybo ka mid ah bariga iyo galbeedka gobolka ilaa Talaadada.
Fatahaado ayaa sidoo kale saameeyay gobolka Odisha ee bariga Hindiya, halkaas oo **in ka badan 75,000 qof** loo daadgureeyay goobo ammaan ah.
Dalka deriska la ah ee Nepal-na, **21 qof** ayaa ku dhintay dhacdooyin la xidhiidha xaaladaha cimilada intii u dhaxaysay Khamiistii iyo Axaddii. Shan qof ayaa weli la la’yahay, shan kalena way dhaawacmeen, halka fatahaado iyo dhul-go’ ay waxyeelleeyeen **194 guri**.
Nepal ayaa weli kasoo kabanaysa fatahaado waaweyn oo dhacay bishii Agoosto, kuwaas oo sababay dhimashada in ka badan **1,400 qof**, iyadoo ku dhowaad **6,000 qof** weli la la’yahay.
By Warda
September 28, 2026
