Hoggaamiyaha aqlabiyadda baarlamaanka Kenya mudane Aadan Barre Ducaale ayaa beeniyey warar sheegaya in uu haysto labada jinsiyadood ee Kenya iyo Soomaaliya, arrintaas oo aanu sharciga dalka Kenya u ogolayn masuuliyiinta dalkaas.
Aadan Ducaale oo
khamiistii 3-da Oktobar la hadlay warbaahinta dalka Kenya ayaa sheegay in aanu
weligiiba yeelan jinsiyad dal kale, qorshahana aanay ugu jirin in uu yeesho.
Hadalka Xildhibaan
Aadan Ducaale ayaa yimi kaddib markii Komishanka anshaxa iyo la dagaallanka
musuqmaasuqa ee dalka Kenya uu ku dhawaaqay in uu baadhis ku samaynayo wararka
sheegaya in masuuliyiin kala duwan oo xilal dadweyne hayaa ay leeyihiin laba
jinsiyadood, arrintaas oo burinaysa xeerka hoggaaminta iyo hufnaanta ee dalka
Kenya. Guddoomiyaha komishankan oo warbaahinta la hadlayna uu sheegay in
masuuliyiinta dembigan lagu helo ay ka qaadi doonaan tallaabooyin ay ka mid
tahay in xilka laga qaado.
Xildhibaan
Aadan Barre Ducaale ayaa faafinta warkan ku eedeeyey dad uu sheegay in ay ka
xun yihiin diidmadii uu baarlamaanka dalka Kenya ku hor istaagay ansixinta
Mawende Mewinzi oo ah haweenay haysata jinsiyadda Maraykanka oo loo magacaabay
danjiraha dalka Kenya u fadhi lahaa Koonfurta Kuuriya. Isaga oo ku dooday in ay
xitaa diidday in ay ka tanaasusho jinsiyaddeeda Maraykanka.
By Hussein Jama
October 4, 2019
