Ganacstada waawayn ee
Somaliland iyo guddiga rugta ganacsiga Somaliland ayaa ka dareeray shir ay kaga
qaybgaleen caasimada dalka Turkiga ee Ankara, oo ay marka hore hay’ado laga
leeyahay dalka Turkiga iyo wasaaradda ganacsiga ee dalkaas Somaliland ku soo
martiqaadeen.
Ganacsatadan oo ka
badan 20 ganacsade ayaa sheegay in markii shirkan lagu soo martiqaadayay loogu sheegay
shirwayne ganacsi oo ay kasoo qayb galayaan shirkado iyo ganacsato ka socda in
ka badan 42 dawladood oo Afrikaan ahi, balse markii ay dalkaasi gaadheen ay ka
war heleen xaqiiqda shirkaasi oo ahayd mid ka duwan tii loogu sheegay.
Gudoomiyaha rugta
ganacsiga Somaliland mudane Jamaal Caydiid Ibraahin ayaa sheegay in shirkaasi
oo markii hore logu sheegay mid ka reeban siyaasadda ay markii ay halkaasi
gaadheen kula kulmeen wasiiro iyo madax ka socota dawladda fadaraalka ah ee
Somaliya oo shirkaas ka qaybgalaysa, sidoo kalena aanay kasoo qayb galin
dawladihii afrikaanka ahaa ee loogu sheegay in ay imanayaan, isaga oo intaas ku
daray in wejigii shirkaasi uu gebi ahaanba isu beddelay mid siyaasadeed.
Gudoomiyaha ganacsatada
Somaliland ayaa sidoo kalana sheegay in la tashi ay la sameeyeen wasiirka
ganacsiga Somaliland ay isku afgarteen in shirkaasi uu yahay mid aan u qalmin
meeqaamkii dawladnimo ee Somaliland iyo tii ganacsatoba, taasina ay sababtay in
ay shirkaad dibadda ka joogaan.
Mudane
Jamaal Caydiid Ibraahin waxa uu intaasi ku daray in waftigan ganacsatada ah ee
ka socotay Somaliland uu midkastaa hawlihiisa u gaarka ah ka qabsan doono dalka
Turkiga, iyada oo aanay marnabana surogal noqon doonin in ay shirkaas ka
qaybgalaan. Sida uu hadalka u dhigay
By Hussein Jama
October 1, 2019
