Mas’uul Masri ah ayaa beeniyay eedeymaha sheegaya in Masar ay ku lug leedahay dagaallada dib uga soo cusboonaaday gobolka Tigray ee waqooyiga Itoobiya.
Ilo xog-ogaal ah oo Masri ah ayaa sheegay in Qaahira aysan wax xidhiidh ah la lahayn iska horimaadyada cusub, isla markaana aysan faragelin ku sameyn arrimaha gudaha ee dalalka kale.
Dhinaca kale, Taliyaha Guud ee Ciidamada Difaaca Itoobiya, Field Marshal Birhanu Jula, ayaa sheegay in xoogag shisheeye ay taageerayaan kooxo hubeysan oo doonaya inay xasillooni-darro ka abuuraan Itoobiya, isagoo magacaabay Sudan iyo Masar.
Xiisadda Tigray ayaa dib u soo cusboonaatay toddobaadyadii u dambeeyay, iyadoo dagaallada cusub ay noqonayaan kuwii ugu cuslaa tan iyo dagaalkii 2020–2022 ee gobolka.
Xaaladda Tigray ayaa muhiim u ah amniga Geeska Afrika, maadaama isbeddellada ka dhaca Itoobiya ay saameyn ku yeelan karaan xasilloonida gobolka iyo dhaqdhaqaaqa siyaasadeed iyo amni ee Badda Cas.
By Warda
September 27, 2026
