Raysalwasaaraha Itoobiya ayaa arbacada 20 ka feeberweri 2019
ka xafiiskiisa ku qaabilay madaxweynaha Somaliland Muuse Biixi Cabdi iyo wafti
uu hoggaaminayo oo booqasho dalkaas ku jooga.
War ay idaacadda Fana ee dalka Itoobiya sii deysay arbacada
ayaa ay ku sheegtay in labada dhinac ay ka wada xaajoodeen iskuna afgarteen
dhowr arrimood oo muhiim ah, kuwaas oo ay ka mid tahay xoojinta xidhiidhka
labadooda ummadood; xaqiijinta in xaaladda dadka Itoobiyka ah ee Somaliland ku
nool la wanaajiyo iyo in si wada jir looga shaqeeyo arrimaha la xidhiidha
nabadda iyo ammaanka.
Warku waxa uu sheegay in madaxweyne Muuse Biixi Cabdi uu
ammaanay tallaabooyinka midnimada iyo iskaashiga gobalka la xidhiidha ee uu
qaaday raysalwasaare Abiy Axmed, isla markaana uu madaxweyne Muuse Biixi Cabdi
aqbalay soo jeedinta raysalwasaaraha Itoobiya ee ahayd in aad loo sii adkeeyo,
xidhiidhka wada shaqayneed ee dhow ee ay leeyihiin Somaliland iyo dawladda
Federaalka ee Soomaaliya.
Gaar ahaan arrimaha la xidhiidha heshiisyada hore loo
gaadhay, si mustaqbalka ay u bilaabaan wada hadallo fool-ka-fool ah.
Warka idaacadda FANA ay ku baahisay shabakaddeeda wararka ee
Internetka waxa kale oo ay ku sheegtay in ay Somaliland iyo Itoobiya, ka wada
hadleen, isticmaalka dekedaha Somaliland iyo arrimo kale oo dhaqaalaha la
xidhiidha, sida uu caddeeye xafiiska raysalwasaaraha Itoobiya.
Dhinaca kale wargeyska The Reporter ee ka soo baxa dalka
Itoobiya ayaa sheegay in xafiiska madaxweynaha Soomaaliya uu u xaqiijiyey in
aanu jirin kulan qorshaysan oo ay Addis Ababa ku yeelanayaan madaxweyne Maxamed
Cabdillaahi Farmaajo iyo madaxweyne Muuse Biixi Cabdi.
Warkan waargeyska The Reporter ayaa jawaab u ahaa warar
gelinkii hore ee isla maalinnimada Arbacada ay faafiyeen qaar ka mid ah
warbaahinta dalka Itoobiya oo sheegayey in ay labada hoggaamiye ku kulmayaan
Addis Ababa.
Waxaa ka mid ahaa wargeyska The Fortune ee ka soo baxa dalka
Itoobiya oo qoray in ilo xukuumadda Itoobiya ka agdhowi ay u xaqiijiyeen in
Madaxweyneyaasha Biixi iyo Farmaajo ay ku kulmayaan magaalada Addis Ababa.
By admin
February 23, 2019
